Tusagassiornermik ilinniut kalaallisooq siulleq saqqummerpoq

Ilisimatusarfimmi Tusagassiornermut Immikkoortortap atuakkanik saqqummersitsisarfik Ajour peqatigalugu saqqummerseqqammerpaa tusagassiornermik ilinniut "Tusagassiornerup tunngavii". 

Atuagaq tusagassiorneq pillugu ilinniummit qallunaatuumit "Journalistikkens grundtrin"-imit, Danmarks Medie- og Journalistskolemi ilinniartitsisunit Solvej Schmidtimit Mette Mørkimillu allagaasumit, nutsigaavoq. Nutsigaannaananili assersuutinik nunatsinneersunik imaqarpoq, kapitaleqarporlu nunatsinni tusagassiuutinut tunngasumik. Taamaalilluni nunatsinni tusagassiortunngornianut, tusagassiortunut tusagassiornermillu soqutigisaqartunut allanut ilisarnartunik arlalinnik imaqarpoq.

Saniatigut taaguutit tusagassiornermut tunngasut atuakkap naggataani qupperneqarsinnaapput, qallunaatuumiit kalaallisuumut kiisalu kalaallisuumiit qallunaatuumut.

Tusagassiorneq pillugu kalaallisut ilinniummik peqalernera Tusagassiornermut Immikkoortortami pisortap Naja Paulsenip pisuunnguallaatitut oqaatigaa:

- Nunatsinni tusagassiortunut ilinniarfeqalerneranit ukiut 40-ngajaat qaangiutillartullu tusagassiornerup tunngavii pillugit ilinniummik kalaallisut allassimasumik kiisami peqalernera tulluusimaarnarlunilu pisuunnguallaataavoq. Tusagassiortunngorniarlutik ilinniartut – allarpassuillumi - kiisami namminneq oqaatsitik atorlugit tusagassiornerup pissusianut sakkuinillu tunngasunik atuagassaqalerput, asulu nunatsinneersunik assersuutissartaqarilluni, Naja Paulsen oqarpoq.

• "Tusagassiornerup tunngavii"
• Quppernerit 252-it
• Kalaallisuunngortitsisoq & aaqqissuisoq: Mariia Simonsen
• Kukkunersiuisoq & siunnersorti: Svend Møller